Буюк Британия бош вазири Дэвид Кэмерон 2016 йил июнда Буюк Британиянинг Европа Иттифоқидан чиқиши бўйича референдум тайинлаши мумкин, деб The Independent нашри ҳукуматдаги ўз манбасига иқтибос келтирган ҳолда хабар бермоқда.

“Даунинг-стритдаги манбалар, Кэмерон ҳозирда европалик етакчилар ўзгаришлар зарурлигини тушунаётганлари ва Буюк Британия бундан кейин ҳам евроҳудудда етакчи роль ўйнашини истаётганларига ишонмоқда. Бир амалдорнинг айтишича, “сўровномалар британияликларнинг ЕИда қолиш истаги охирги чорак аср давомида энг юқори эканлигини кўрсатмоқда”, деб ёзмоқда нашр.

Брюссель билан алоқаларнинг узилишига қарши чиқаётган Кэмерон айни дамдаги вазиятдан натижада Буюк Британия ЕИда қолиши учун максимал фойдаланиб қолишни мўлжаллаяпти, деб айтмоқда манбалар.

Буюк Британия парламенти қуйи палатаси 9 июнда иккинчи ўқишда мамлакатнинг Европа Иттифоқидан чиқиши бўйича референдум ўтказиш ҳақидаги қонун лойиҳасини қўллаб-қувватлади.

24 июль куни АҚШ президенти Британия глобал жараёнларни қўллаб-қувватлаши учун ЕИдаги аъзолигини сақлаб қолиши кераклигини таъкидлаб ўтди.