Еврокомиссия раҳбари Жан-Клод Юнкер Туркия ҳукуматини Курдистон ишчи партиясига қарши пропорционал чоралар кўришга чақирди. Бу ҳақда ташкилотнинг расмий вакили Мина Андреева маълум қилди.
Туркия қуролли кучлари ўтган жума Сурия шимолида ИШИДга қарши, Ироқ шимолида эса КИПга қарши операциялар ўтказишни бошлади. Операцияда F-16 қирувчи самолётлари қўлланилмоқда. Бунга жавобан партия расмийлари Анқара билан имзоланган сулҳ битими ўз кучини йўқотганини маълум қилди. Шундан сўнг мамлакат бўйлаб бир қанча террорчилик актлари уюштирилди. Жумладан, бугун Туркия жандармлари Арзирум вилоятидаги бўлинмага ҳужум уюштирган уч нафар жангарини йўқ қилди. Уларнинг Курдистон ишчи партиясига алоқадорлиги айтилмоқда. Мамлакат жануби-шарқидаги Муш вилоятида жангарилар жандармерия гарнизони командирининг машинасини ўққа тутган. Машинада унинг рафиқаси ва боласи бўлган. Уларга зиён етмаган, аммо зобитнинг ўзи олинган жароҳатлардан вафот этган.
Бундан ташқари, душанба куни Ван вилоятидаги автотрассада жандармлар ва жангарилар ўртасида отишма юзага келди. Экстремистлар йўлни тўсиб қўйиб, ҳайдовчиларнинг ҳужжатларини текшириб, “шубҳали”ларни ўтказишмаган. Улар битта юк машинасига ўт қўйган. Воқеа жойига етиб келган жандармларга қарата автоматик қурол ва гранатомётлардан ўқ узилган. Жиноятчилар яқин атрофдаги тоғларга беркинишга улгурган, уларни қидириш бўйича махсус операция бошлаб юборилган.