Курд жангарилари Туркия шарқидаги жандармерия бўлимини ўққа тутди

Жаҳон 28 Июль 2015 3009

Туркия жандармлари Арзирум вилоятидаги бўлинмага ҳужум уюштирган уч нафар жангарини йўқ қилди. Уларнинг Курдистон ишчи партиясига алоқадорлиги айтилмоқда. Маҳаллий телевидение орқали хабар берилишича, келиб чиққан отишмада учала жангари ҳам ўлдирилган.
Ҳужумдан сўнг воқеа жойига қўшимча кучлар юборилган. Ҳаво кучлари ҳам ишга жалб қилинган.
Шу билан бирга, мамлакат жануби-шарқидаги Муш вилоятида жангарилар жандармерия гарнизони командирининг машинасини ўққа тутган. Машинада унинг рафиқаси ва боласи бўлган. Уларга зиён етмаган, аммо зобитнинг ўзи олинган жароҳатлардан вафот этган.
Бундан ташқари, душанба куни Ван вилоятидаги автотрассада жандармлар ва жангарилар ўртасида отишма юзага келди. Экстремистлар йўлни тўсиб қўйиб, ҳайдовчиларнинг ҳужжатларини текшириб, “шубҳали”ларни ўтказишмаган. Улар битта юк машинасига ўт қўйган. Воқеа жойига етиб келган жандармларга қарата автоматик қурол ва гранатомётлардан ўқ узилган. Жиноятчилар яқин атрофдаги тоғларга беркинишга улгурган, уларни қидириш бўйича махсус операция бошлаб юборилган.

Кўпроқ янгиликлар