"Донецк халқ республикаси" таълим вазири Игорь Костенканинг маълум қилишича, 2015 йилда Россиядаги мактаб ва коллежларни тамомлаган 160 нафар атрофидаги битирувчилар "ДХР"даги олий ўқув юртларига кириш учун ҳужжат топширишган. Бу ҳақда "Известия" нашрида ёзилди.

Ўз навбатида Донбассдан Россияга 600га яқин битирувчилар таълим олиш мақсадида йўл олишган.

"Россиядан келувчиларнинг аксари Донецк миллий техника университети, Донецк миллий университети ҳамда Донецк миллий иқтисодиёт ва савдо университетига ҳужжат топширишган", дейди Костенка.

Унинг қўшимча қилишича, россиялик талабалар Донбассдаги олийгоҳларда ўқишни тамомлаганидан кейин иккита давлат дипломи (Россия ва "ДХР") эгаси бўлишади.

"ДХР" Думасининг таълим масалалари бўйича қўмитаси раҳбари ўринбосари Владимир Бурматов россиялик ёшлар Донбассга ўз хоҳишлари билан келишаётгани, бу ердаги таълим дастурига катта қизиқиш билдиришаётганини таъкидлаган.

Ўз навбатида Россия талабалар уюшмаси раҳбари Юрий Наконечнийнинг фикрича, талабалар Донбассдаги ОЎЮларга кириш осон бўлишига умид қилган ҳолда ҳужжат топширишмоқда.

"Менимча, Донецкдаги таълим муассасалари россиялик абитуриентлар учун захира варианти ҳисобланади. Бундайларнинг аксари Ростов вилоятидан. Ростов ва Таганрогдаги олийгоҳларда эса янги ўқув йили арафасида бюджет ўринлари тенг ярмига қисқарган", дейди Наконечний.