ЕИ дипломатияси раҳбари Федерика Могерини берган баёнотга кўра, Эронга нисбатан жорий қилинган санкцияларнинг бекор қилиниши ядровий дастур бўйича эришилган келишув ижроси билан бир текис амалга оширилиши лозим. Бу ҳақда Reuters агентлиги хабар бермоқда.

Сиёсатчининг фикрича, бу тактика Эронга Европа инвестицияларининг кириб келишига имконият бериш билан бирга, савдо муносабатларининг ривожланишига ёрдам беради.

Бундан ташқари, Могерини хоним минтақада хавфсизлик ва барқарорликнинг мустаҳкамланиши кўп жиҳатдан шу жараёнга боғлиқ бўлишини таъкидлаб ўтди. Бунда биринчи навбатда Эрон раҳбариятининг ташқи сиёсатда янги саҳифа очишга бўлган кучли иродаси муҳим аҳамият касб этади.