Ўзбекистон мусулмонлари идораси тизимида ҳар йили “йил имоми” кўрик танлови ўтказилиб келинмоқда. Танловни ўтказишдан мақсад ўзбекистон республикаси вазирлар маҳкамасининг “виждон эркинлиги ва диний ташкилотлар тўғрисида”ги қонунни ҳаётга татбиқ этиш, интизомли, илғор, ташаббускор, тадбиркор, нутқи равон ва кенг омма афкорига ўз фикрини теран тушунтириб, етказиб бериш қобилятига эга бўлган энг иқтидорли, ҳар томонлама фаол йил имом-хатибларни аниқлаш ва кенг жамоатчиликка маълум қилиш.
Жорий йилнинг 27 июль куни Навоий вилоятида ҳам мазкур танловнинг вилоят босқичи бўлиб ўтди. Бу ҳақда muslim.uz портали хабар бермоқда. Хабарда келтирилишича, вилоят босқичида туманларда ғолибликни қўлга киритган имом-хатиб ва имом-ноиблар иштирок этишди. Кўрик танлов қатнашчилари Қуръони карим оятларининг тафсири, турли фиқҳий масалалар, Ислом тарихи, ақидапараст оқимлар ва уларнинг сохта иддаолари мавзулари бўйича синовдан ўтдилар. Шунингдек, иштирокчиларнинг оммавий ахборот воситаларидаги чиқишларига ҳам алоҳида эътибор қаратилди.
Кўрик танлов давомида қатнашчилар ўзларининг билимдонлик, ҳозиржавоблик ва илмий салоҳиятларини яна бир намойиш этдилар.
Якуний босқич натижаларига кўра, биринчи ўрин Кармана тумани “Жалойир” жоме масжиди имом-хатиби Ҳакимов Абдулвоҳидга насиб этди. Тадбир сўнгида, ғолиб ва иштирокчиларга совғалар топширилди.