29 июль куни Афғонистон ОАВлари "Толибонлар" етакчиси мулла Муҳаммад Умарнинг ўлдирилгани ҳақида хабар тарқатишди. Буни нашрларга Афғонистон ҳукуматига яқин манба маълум қилган. Ҳукумат эса ҳали бу ҳақда расмий баёнот билан чиқмаган.

Маҳаллий нашрларда айтилишича, бу маълумот "Толибонлар"дан алоҳида ажралиб чиққан "Маҳаз Фидоий" жангариларидан олинган.

Мулла Умарни унинг ёрдамчилари Ахтар Муҳаммад Мансур ва Гул Оға ўлдиргани гумон қилинмоқда.

Покистондаги The News нашрининг ёзишича, агар мулла Умарнинг ўлими тасдиқланса, унинг ўрнига катта ўғли Муҳаммад Ёқуб "Толибонлар"нинг янги етакчиси сифатида тан олинади.

Эслатиб ўтамиз, "Толибонлар" Афғонистон ҳукумати билан музокара бошлаган, яқин вақт ичида Хитойда музокараларнинг иккинчи босқичи ўтказилиши кутилаётганди.