Санкт-Петербургда 67 ёшли Тамара Самсонова 79 ёшли дугонасини ўлдирганликда айбланаётган эди. Фонтанка.ру сайтининг ёзишича, у яна 9та қотилликда гумон қилинмоқда.
26 июль куни милиция Валентина Уланованинг бошсиз танасини топиб олди. Жиноят тезлик билан фош этилди: танани уйдан олиб чиқаётган Самсонова кузатув камераларида қайд қилинган эди. Айни пайтда изқуварлар 2003 йили содир этилган шунга ўхшаш жиноятни эсга олишди. Шу боис икки нафақахўр бирга яшаган хонадонда тинтув ўтказилди.
Қон изларидан ташқари, хонадонда уч тилли кундалик ҳам топилди. Унда 10та қотиллик батафсил тасвирланган эди. Шунингдек, юлиб олинган варақлари 12 йил муқаддам ўша жиноят ерида топилган китоб ҳам шу хонадонда эканлиги аниқланди.
Жиноятларга диний-эзотерик мотивлар ва ҳатто одамхўрлик сабаб бўлгани тахмин қилинмоқда.