Голландиянинг ING банки ўз фаолиятига замонавий технологияларни жорий қилган ҳолда ўз мижозларига овозли аутентификация хизматини таклиф қилмоқчи.
Маълумки, одатда банкдан телефон орқали маълумот олиш учун мижозни танитиш пароллари жорий қилинади. Яъни, бирор маълумот олиш учун мижоз дастлаб ўз паролини эслаб, уни тасдиқлатиб олганидан кейингина мурожаат қила олади.
Эндиликда пароль вазифасини мижознинг овози бажариши айтилмоқда. Бунинг учун тизимга ҳар бир мижознинг овози киритилади. Сўров келиб тушганида мижоз овоз орқали таниб олинади, шундан сўнг телефон орқали керакли банк хизматлари кўрсатилаверади.
ING банки томонидан қўлланилувчи овозли биометрия технологияси Nuance Enterprise компанияси мутахассислари томонидан ишлаб чиқилган. Муаллифларнинг айтишича, ушбу технология нафақат ўта хавфсизлиги билан диққатни тортади, балки паролларни эсдан чиқарувчи мижозларнинг ҳам ҳаётини осонлаштиради.