Буюк Британия бош вазири Дэвид Кэмерон Бирлашган Қиролликни Франциянинг Кале шаҳридан Евротуннел орқали Буюк Британияга келишга уринаётган муҳожирлар учун “хавфсиз бўлмаган бошпана” деб атади.

Кэмероннинг айтишича, ноқонуний муҳожирлар Британияга келишлари хамоноқ мамлакат ҳудудидан чиқарилиб юборилади.

“Чегараларимизни ҳимоя қилиш, британияликлар тинч ухлашлари учун барча чоралар кўрилади”, деб айтди Кэмерон.

Кэмероннинг айтишича, Ла-Манш бўғози остидаги туннелни назорат қилиш учун яна 120 нафар француз полициячиси жалб этилади.

Мухожирлар Евротуннел ҳудудига кириб, у ердан Буюк Британияга етиб олишга уринмоқдалар. Ҳафта ичида шундай уринишлардан 3,5 мингтаси қайд этилди. Ҳаммаси бўлиб Кале шаҳрида 3 мингга яқин муҳожир тўплангани айтилмоқда.

Январь ойидан бошлаб Евротуннел вакиллари 37 минг муҳожирнинг Британияга етиб олишига тўсқинлик қилган. Июнь ойида туннелда 9 нафар муҳожир ҳалок бўлган эди.

Евротуннел 51 км узунликка эга бўлиб, Европани Буюк Британия билан боғлайди. Евротуннелнинг охири Британияда Дувр шаҳри ва Францияда Кале шаҳри билан тугайди.