Lexus компанияси BMW 6-Series ва Mercedes-Benz S-Class моделларига рақобат ташкил қила оладиган катта ўлчамдаги спорткупени йўл синовларидан ўтказишни бошлади.
Ушбу LF-LC деб номланувчи концепт-карнинг илк жосуслик суратларини Instagram’да The Smoking Tire лойиҳасининг бош продюсери Мэтт Фара чоп этди.

Икки эшикли янги модель ҳақидаги расмий маълумотлар ҳозирча сир сақланмоқда. Янги модель Токио автосалонида кузда илк бор намойиш қилинадиган кейинги авлод LS седани шассисида қурилиши тахмин қилинмоқда.

2014 йилнинг ноябрида “Лексус” АҚШ, Канада ва Австралияда янги спорткарга берилиши керак бўлган LC 500 ва LC 500h номларини рўйхатдан ўтказди. Бу белгилашлар модель анъанавий бензинли двигатель ва гибридли двигатель билан ишлаб чиқарилишини англатади.

Тахмин қилинишича, моделнинг биринчи модификацияси 480 от кучига эга 5 литрли 8 цилиндрли двигатель билан жиҳозланади. Моделнинг бензин-электр двигателли варианти ҳақида аниқ маълумотлар берилмаган. Бу гибрид куч қурилмасининг қуввати 500 от кучидан ошиши тахмин қилинмоқда.

Lexus LF-LC концептуал купеси 2012 йилда Детройт автосалонида намойиш қилинган. Норасмий маълумотларга кўра, ушбу прототип 506 от кучига эга двигатель билан жиҳозланган.