Тошкент вилоятининг Оққўрғон туманида истиқомат қилувчи Жонузоқ Хурсандовга тегишли 4 ёшли чопағон байтал ва унинг тойчоғи ўғирлаб кетилди. ИИВ матбуот хизматининг маълумот беришича, жониворлар далада бойлаб қўйилган ва қаровсиз қолиб кетган.
Шундан сўнг уларнинг эгаси тегишли идорага мурожаат қилди. ИИБ тергов бўлими бошлиғи, подполковник Шавкатжон Акрамов бошчилигидаги тезкор тергов гуруҳи олиб борган ишлар давомида ушбу жиноятни содир этишда гумон қилинган тўрт киши сўроқ қилинди. Маълум бўлишича, улар байталнинг кўпкаридаги иштирокини кўриб, маст ҳолда уни ўғирлашга ва қимматга сотишга келишиб олишган. Отлар из қолдирмаслиги учун уларнинг туёқларига мато боғланган.
Отлар эгаларига қайтарилиб, жиноятчилар судга тортилди.