АҚШ президенти Барака Обама маъмурияти Вашингтон томонидан америкаликларга тегишли шахсий маълумотларни бузиб кириб, уларни ўғирлаганликда айблаётган Хитойга қарши жавоб киберҳужумини бериш керак, деб ҳисобламоқда. Бу ҳақда New York Times нашри хабар берган.

Аввалроқ кибербосқинчилар қўлига ходимлар идораси вазифасини ўтайдиган АҚШ маъмурияти режа-маъмурий бошқармасида сақланган 4 млн америкалик ҳақидаги маълумотлар тушгани маълум бўлганди. Бир қатор АҚШ ОАВлари АҚШ ҳукумати вакилларига иқтибос келтирган ҳолда ҳужумни хитойлик хакерлар амалга оширганини маълум қилган.

Жорий йилнинг май ойида Хитойдаги IP-адреслардан сўровларнинг кўпайгани қайд қилинган. DOS-ҳужум оқибатида АҚШ армиясининг сайти вақтинчалик ишламай қолган. Вашингтондаги расмий шахслар киберҳужум оқибатида қўлга киритилган маълумотлар АҚШнинг Хитойдаги жосуслик тармоғининг ошкор қилинишига олиб келиши мумкинлигидан хавотир билдиришган.

АҚШ президенти маъмурияти ҳукумат серверларига бузиб киришлар хавфи миқёсини баҳолаб, Хитойга қарши жавоб киберҳужумини ўтказишга қарор қилди. Барак Обама жосусликнинг анъанавий усуллари жадаллик билан ўз самарадорлигини йўқотаётгани ҳақидаги қарорга келиб, разведка бошқармасига янги босқич – киберҳужумларга ўтиш кераклигини уқдирмоқда.

“Биз рақибларимиз киберҳудудда амалга ошираётган ишларини тўхтатишимиз ва уларни ушлаб туришимиз лозим ва бу сиз жавоб бериш учун барча усуллардан фойдаланишингиз кераклигини англатади”, деб айтди вазиятдан хабардор бўлган юқори лавозимдаги мансабдор шахслардан бири.

Натижада Оқ уй Хитойнинг ахборот ҳудудини ҳимоя қилувчи “Буюк Хитой файрволи”га ҳужум қилиш вариантларини ишлаб чиқишни бошлади. Ўз навбатида, Хитойда АҚШ махсус хизматларининг айбловлари асоссиз эканлиги таъкидланмоқда.