1 август куни Фигурали учиш бўйича Олимпиада чемпиони Татьяна Навка Россия президентининг матбуот хизмати бошлиғи Дмитрий Песковга турмушга чиқди.

РИА Новости нашрининг хабар беришича, никоҳ маросими Сочи шаҳридаги энг машҳур отеллардан бири Rodina Grand Hotel & SPA`да ўтказилган.

Бироз олдинроқ, Владимир Путин ҳам бу маросимга таклиф этилгани хабар қилинганди. Ҳозирча у тўйда иштирок этгани ҳақида аниқ маълумот билдирилмади.

Хабарларда тўй 2 кун давом этиши айтилганди.

Шу тариқа, Песков учинчи марта уйланди, Навка эса иккинчи марта турмушга чиқди.

Эслатиб ўтамиз, бироз олдинроқ, Tatler нашрига берган интервьюсида Татьяна Навка Песков билан 2010 йилда, умумий танишларининг туғилган куни зиёфатида илк марта учрашишгани, улар ўша кечада "9 1/2 недель" фильми мусиқасига биргаликда рақс тушишгани ҳақида айтиб берганди. Навка шу йилнинг апрелида эса Znak.com нашрига Песков билан турмуш қурмоқчилигини билдирганди.