Россияда Байкал кўлида “Баргузин” теплоходи ёниб кетди. Бу ҳақда Россия Фавқулодда вазиятлар вазирлигининг Иркутск вилояти бўйича бош бошқармаси сайтида маълум қилинди.

“Москва вақти билан 12:11 да “Баргузин” кемасида машина бўлимида двигателнинг портлашидан кейин ёнғин чиққани ҳақида хабар олинди. Теплоход Большое Голоустное посёлкаси ҳудудидаги соҳилдан 1,5 км узоқликда сузиб кетаётган бўлган. Кемада 120 киши бўлган, уларнинг барчаси қутқариш қайиқларига эвакуация қилинди ва қутқариш жилетлари билан таъминланди”, дейилмоқда хабарда.

Қайд этилишича, воқеа жойига барча сузиш воситалари жўнатилган.

Кейинроқ фалокат жойига “Петр Великий” теплоходи етиб келиб, сувдаги йўловчиларни ўз бортига олган. Маълумотларга кўра, жабрланганлар йўқ.

Ўт ўчирувчилар теплоходдаги ёнғинни бартараф қилдилар.