1 август куни Россия президенти Владимир Путиннинг матбуот котиби Дмитрий Песков Сочида Татьяна Навка билан никоҳдан ўтди. Тадбирда туширилган фотосуратларда блогерлар Песковнинг қўлидаги қимматбаҳо соатга эътибор қаратишди ҳамда унинг “ҳалол йўл” билан сотиб олинганлигига шубҳа билдиришди.


Гап шундаки, ушбу соатнинг нархи Песковнинг тўрт йиллик даромадига тенгдир.
Бир муддатдан сўнг Песков РБКга берган интервьюсида ушбу соатни унга рафиқаси Навка тўй куни совға қилганлигини айтди.
“Бу Танянинг совғаси. Дарҳақиқат, соат жуда қимматбаҳо. Лекин у айрим дўстларимиз айтганидан бирмунча арзонроқдир”, – деди у.
Шунингдек, Песков рафиқаси ушбу соатни ўз пулига сотиб олганлигини таъкидлади.
Суратдаги соат Richard Mille RM 052 Tourbillion Skull’га ўхшатилмоқда. Унинг нархи 9 млн рублдан 23 млн рублгача (385 минг доллар) бўлиши мумкин.
Алексей Навальнийнинг коррупцияга қарши кураш жамғармаси Песковнинг қўлидаги соат чекланган ададда 30 дона чиқарилганлигини аниқлади. Бундай партиянинг нархи 620 минг долларни ташкил қилади, бу Россия миллий валютасида 37.8 млн рубль демакдир. Айни пайтда, Песковнинг 2014 йилги даромад декларациясига кўра, унинг йиллик даромади 9.1 млн рублни ташкил қилади.
Бундан ташқари, айрим блогерларнинг таъкидлашича, ушбу соат 2014 йили Песковнинг қизи Инстаграмда чоп этган расмда ҳам қайд қилинган. 2014 йил қишида Сочи олимпиадаси чоғида Песков Навка билан тушган суратида ҳам шунга ўхшаш соат бор эди.