Россиянинг Рязань вилоятидаги “Дубровичи” полигонида уюштирилган, “Авиадартс” халқаро танловини очиб берувчи “Авиамикс” авиашоусида Ми-28Н вертолётларида чиқиш қилаётган “Бургутлар” пилотаж гуруҳига тегишли вертолётлардан бири кутилмаганда ерга қулади.
Ер билан тўқнашган машина ўт олди. Гувоҳларнинг билдиришича, вертолётнинг думидаги парраги ишдан чиққан. Трюклардан бирини ижро этгач, машина қулай бошлаган.
Воқеа жойига Россия ҳарбий ҳаво кучлари авиация бошлиғи Сергей Кобилаш етиб келди. Аниқланишича, вертолёт учувчиларидан бири ҳалок бўлди, иккинчиси эса енгил жароҳат олди.
Мудофаа вазирлиги матбуот хизматининг хабар қилишича, бирламчи текширувлар натижасида вертолёт нега ҳалокатга учрагани аниқланган. Мутахассислар ҳалокат техник сабабларга кўра содир бўлганини таъкидламоқда. Жумладан, машинанинг гидротизими ишдан чиққани айтилмоқда.