Тожикистон жорий йил охиригача Ўзбекистон олдидаги қарзларини тўлиқ узишни режалаштирмоқда.

Тожикистон молия вазирлигининг маълум қилишича, мамлакатнинг Ўзбекистон олдидаги қарзи 2015 йилнинг бошидаги 8,03 млн доллардан 2,99 млн долларгача қисқарди. Хусусан, жорий йилнинг биринчи ярмида Ўзбекистон олдидаги 5,04 млн долларлик асосий қарз ва унга фоиз сифатида 30 минг доллар тўланди.

Тожикистон молия вазирлиги маълумотларига кўра, мамлакат йил охиригача Қозоғистон олдидаги 610 минг доллар қарзини ҳам узмоқчи.

Тожикистоннинг умумий ташқи қарзи жорий йилнинг иккинчи ярим йиллиги бошига 2,1 млрд долларни, яъни мамлакат ЯИМнинг 19,5 фоизини ташкил қилмоқда.

Тожикистон қарзи жорий йил бошига нисбатан 34,6 млн долларга қисқарди.

Тожикистон Хитой олдида энг катта қарзга эга бўлиб, унинг миқдори 942 млн долларни ташкил қилмоқда.