АҚШ президенти Барак Обама экология мониторингини ошириш ва газ ташламаларини камайтиришга қаратилган Clean Energy Plan (Тоза энергия режаси) ни таклиф қилди. Bloomberg агентлигининг маълум қилишича, АҚШ чиқиндилар ҳажмини 2005 йил кўрсаткичларига нисбатан 32 фоизга қисқартирмоқчи. Режа 2030 йилга қадар амалга оширилади.

“Биз сайёра атмосферасини 870 млн тонна карбонат ангидриддан қутқарамиз”, – таъкидлади АҚШ етакчиси.
Шунингдек, у иқлим ўзгаришларини инсоният келажагига бўлган асосий таҳдид деб ҳисоблашини маълум қилди. Обама ишлаб чиқариш қолдиқларининг атмосферани булғашига қарши, шунингдек, муқобил энергия манбаларини ривожлантириш учун зарурий чораларни кўриш ва фаоллаштириб бориш талаб этилишини айтиб ўтди. Унинг сўзларига қараганда, охирги ўн йилликда АҚШ бу борада бошқа давлатлардан кўра самаралироқ ишлар олиб борди.

“Иқтисодиётнинг ўсиб борганлигига қарамай, биз ишлаб чиқариш чиқитларининг атмосферага чиқарилишини бошқа давлатларга нисбатан анча фаол камайтирдик. Аммо фан янада кўпроқ иш қилиш кераклигини таъкидламоқда. Агар биз ҳаммасини тўғри қилмасак, балки, вазиятни ўнглай олмай, орқага қайтара олмай қоламиз”, – таъкидлади президент.