Олмалиқ тоғ-металлургия комбинати акциядорлик жамиятининг мисни бойитиши фабрикасида янги тегирмон қурилмоқда. Бу ҳақда “Правда Востока” газетаси ёзмоқда.
Айни пайтда комбинатда 17та йирик инвестицион лойиҳа амалга оширилмоқда. Улардан бири мисни бойитиш фабрикаси майдалаш бўлимининг реконстуркциясидир. Ушбу фаолият доирасида “Элемент қурилиш” корхонаси томонидан барча замонавий талабларга жавоб берувчи тегирмон қурилмоқда.

“Ишларнинг миқёси ҳақида бир нарсадан билса бўлади: объектда турли мутахассисликдаги 500 киши меҳнат қилмоқда, ўнлаб техника воситалари қўлланилмоқда, – дейди газетанинг суҳбатдоши, фабрика директорининг қурилиш бўйича ўринбосари Усмонали Танжаров. – Йил охирига қадар бетон ва пўлатдан ясалган 23 м баландликдаги бино қад кўтаради. Тегирмоннинг диаметри 9.5 м. Бугун фабрикамиз йилига 29-30 млн тонна рудани қайта ишламоқда. Янги тегирмоннинг ишга туширилиши билан бу сонга яна 7.8 млн тонна руда қўшилади”.