Қирғизистон ташқи ишлар вазирлигининг маълум қилишича, давлат чегараларидаги вазият бўйича музокаралар Ўзбекистон томонининг шартларни бир томонлама ўзгартиргани туфайли амалга ошмай қолган. Ўз навбатида, Ўзбекистон ташқи ишлар вазирлиги бу борада Қирғизистон дипломатиясининг эътиборсизлиги ҳал қилувчи роль ўйнаганини таъкидламоқда.

Айтилишича, 31 июль куни ТИВга Ўзбекистоннинг Қирғизистондаги элчиси Камол Рашидов таклиф қилинди. Дипломатик миссия раҳбари ўзаро келишувга кўра экспертлар гуруҳи ҳукуматлараро келишувларни муҳокама қилиш учун Тошкентга учиб кетганидан бохабар қилинди.

Қирғизистон ташқи сиёсий идорасининг фикрича, Ўзбекистон томонидан учрашув формати ва шартлари ўзгартирилгани ҳақида ахборот Қирғизистон делегацияси таркиби тасдиқланганидан сўнг берилган, шу боис музокаралар амалга ошмаган.

Ўз навбатида, Ўзбекистон ТИВ бу борадаги ахборот Қирғизистон ТИВга 5 июнь куни юборилганлигини таъкидламоқда. Янги таклифда икки давлат чегара, божхона, транспорт хизматлари, ташқи сиёсий ва ташқи иқтисодий идоралар вакилларининг эксперт учрашувини ташкил қилиш кўзда тутилган эди.

Бундан ташқари, Ўзбекистон ташқи сиёсий идораси Қирғизистон фақатгина 24 июль куни делегация таркибини маълум қилганлигини ва бу таркиб экспертлик даражасига мувофиқ эмаслигини таъкидлади.

“Ўзбекистон ТИВ 26 июль куни яна бир бор ўзининг приципиал ёндашувини эътиборга олишни сўраб мурожаат қилди. Аммо Қирғизистон томонидан 28 июль куни берилган жавобда бу ёндашув эътиборга олинмаган. Шу куниёқ Ўзбекистон ТИВ расмий нота билан айни пайтда Қирғизистон томонидан таклиф қилинган таркиб билан музокаралар ўтказиш мумкин эмаслигини хабар қилди”, – дейилади хабарномада.