Самарқандда машинасининг ўғирланганлиги ҳақида ёлғон маълумот берган шахс жазога тортилди. Бу ҳақда “Куч – адолатда” нашри ёзмоқда.
Келтирилишича, самарқандлик Элмирза Боқиев 2013 йили сотиб олган ВАЗ-2107 машинасини чет элга кетиш олдидан жиззахлик Истам Сувоновга ижарага берган. Бироқ, чет элдан қайтгач, ижара пулини ололмаган.

Унинг пулларини қайтармаган дўстини “жазолаш” мақсадида Боқиев ИИБга мурожаат қилиб, машинасининг ўғирлаб кетилгани ҳақида ариза ёзиб берди. Бироқ тергов жараёнида унинг ёлғони фош этилиб, унинг ўзи жавобгарликка тортилди.
Суд унга ойлик иш ҳақининг 20 фоизини давлат ҳисобига ушлаб қолиш йўли билан 1.5 йиллик муддатга ахлоқ тузатиш ишлари жазосини тайинлади.