Андижон вилоятида фаолият юритган, сохта дипломлар тайёрлаб бериш билан шуғулланиб келган гуруҳ қўлга олинди. Бу ҳақда “Ҳуқуқ” газетаси хабар бермоқда.
Оқёр саноат касб-ҳунар коллежини 2013 йили 158 ўқувчи битириши лозим эди. Аммо турли сабабларга кўра улардан 35 нафари курсда қолдирилди.
Мана шундай кунлардан бирида директор К. Дўстматовнинг олдига ўқув ишлари бўйича ўринбосари Элёр Ҳайдаров келиб, учта ўқувчига пул эвазига диплом ёзиб беришни, барча ҳужжатлар тўғирланишини маълум қилди.
Шу тариқа, бу икки мансабдор шахс сохта дипломлар тайёрлашни йўлга қўйиб, турли шахсларга “хизмат кўрсата” бошлади. Ҳатто коллежни битирмаган ўқувчиларга ҳам диплом ёзиб берилаверди. Шу йўл билан гуруҳ 19та сохта диплом сотган.
Ўтказилган текширув натижасида ушбу коллежнинг бошқа ходимлари томонидан 2010-2012 йилларда ҳам шундай жиноятлар содир этилганлиги фош этилди.
Ҳуқуқ-тартибот органлари вакилларининг хабар қилишича, бу ерда сохта диплом тайёрлаб беришнинг ўртача нархи 500 доллар бўлган.
К. Дўстматов 7 йилга, Ҳайдаров 7 йилга озодликдан маҳрум қилинди. Уларга ёрдам берган шахслар 2-3 йилга қамалди.