Москва шаҳрининг энг жиддий муаммолари, шаҳарликларнинг фикрича, йўл тирбандликлари (53 фоиз) ва биринчи эҳтиёж моллари нархининг баландлигидир (42 фоиз). Бу борада Левада-центр томонидан ўтказилган сўровнома натижалари Интерфакс агентлиги томонидан эълон қилинди.

Шунингдек, сўровнома иштирокчилари энг жиддий муаммолари бешталигига МДҲ ва Шимолий Кавказдан келган муҳожирлар сонининг кўплигини (35 фоиз), зарарли чиқиндилар ва автомобиллар шовқинини (30 фоиз) ҳамда коммунал тўловларнинг ошишини (29 фоиз) киритишди.

Бошқа муаммолар қаторида кўчалардаги чиқиндилар, поликлиникаларнинг камлиги, уларнинг иш фаолияти яхши йўлга қўйилмагани, сифатсиз тиббий хизмат, йўл қопламасининг сифатсизлиги, даромаднинг камлиги, сув ва ҳавони ифлослантираётган корхоналар, атроф муҳитнинг ифлосланиши, гиёҳвандлик ва ичкиликбозликнинг кўпайиши тилга олинди.

Сўровнома 30 июндан 6 июлга қадар 18 ёшдан ошган 875 нафар москвалик орасида ўтказилган. Респондентлардан уларни ташвишга солаётган 5-6та муаммони санаб ўтиш сўралган.