Жиноий ишлар бўйича Наманган вилоят суди шаҳарда истиқомат қилувчи фуқарони экстремизм, айирмачилик ва фундаментализмни тарғиб қилувчи материалларни сақлаганликда айблаб, 5.5 йилга озодликдан маҳрум қилди.
Давлат божхона қўмитаси сайтида хабар қилинишича, гумондор апрель ойида Санкт-Петербургдан Андижон аэропортига келиб тушганида қўлга олинган. Унинг юклари орасида бўлган шоколадлар ичида иккита 8 Гб ли MicroSD хотира картаси яшириб қўйилгани, улар ичида экстремистик материаллар сақланаётгани аниқланди.
Диний йўналишдаги 1 230 видео ва аудиоматериалларнинг давомийлиги 20 соатни, ҳажми эса 14.8 Гб ни ташкил қилган. Диний экспертиза ушбу материалларнинг аксарияти “Ўзбекистон ислом ҳаракати” экстремистик ташкилоти томонидан тайёрланганлигини кўрсатди. Шунингдек, материаллар ичида Сурияда ўзбек тилида ИШИДга атаб куйланган қўшиқлар, халифат тузишга даъватлар бор.
Таъкидланишича, 2015 йилнинг биринчи ярмида Андижон вилоятида 95та шундай ҳолат қайд қилинган.