Россиянинг Хабаровск ўлкасида йирик ЙТҲ оқибатларини бартараф қилиш учун фавқулодда вазият эълон қилинди. Бу ҳақда РИА Новости агентлиги хабар бермоқда.

Чоршанба куни Комсомольск-на-Амуре – Хабаровск трассасининг 125 км участкасида иккита рейс автобуслари тўқнашиб кетди. Россия соғлиқни сақлаш вазирлиги маълумотларига қараганда, ЙТҲда 56 киши жабрланган. Ҳалок бўлган 16 кишининг бири ёш боладир.

Ушбу ҳалокат оқибатларини бартараф қилиш учун ўлка ҳокими томонидан фавқулодда ҳолат жорий қилинди. Воқеа жойида қутқарувчилар ишламоқда. Жабрланганларга ёрдам кўрсатилмоқда.

Хабаровскда ҳалок бўлганлар ва жабрланганларнинг қариндошларини вақтинчалик жойлаштириш пункти ташкил қилинди. Автобус йўловчилари ичида турли вилоятлар вакиллари борлиги туфайли уларни кўргани ёки олиб кетгани келадиган қариндошлар ва яқинларнинг аксарияти бошпанага муҳтож бўлиши айтилмоқда.