Голливуд актрисаси Шарлиз Терон 40 ёшга тўлди

Маданият 07 Август 2015 5132

2015 йилнинг 7 августида АҚШлик актриса ва продюсер Шарлиз Терон 40 ёшлик таваллуд айёмини нишонлайди.

Шарлиз Терон 1975 йил 7 августда Жанубий Африка Республикасининг Трансвааль вилояти Бенони шаҳрида таваллуд топган. Унинг отаси қурилиш компанияси ва кичик ферманинг эгаси бўлган. Шарлиз 15 ёш бўлганда оилавий жанжалда унинг онаси маст ҳолатдаги отасини отиб қўйган. Суд қотилликни ўзини ҳимоялаш деб топиб, Шарлизнинг онасини жавобгарликдан озод қилган. Бу факт актриса томонидан анча вақт сир сақланган – актриса интервьюларда отаси йўл-транспорт ҳодисасида ҳалок бўлганини айтиб юрган.

Шарлиз 6 ёшдан рақс билан шуғулланган. У 13 ёшида Йоханнесбургдаги балет мактабида таҳсил ола бошлаган.

16 ёшида моделлар танловида ғолиб бўлган. 17 ёшида Нью-Йоркдаги нуфузли рақс мактабига ўқишга кирган, бироқ тиззасидан олган жароҳати туфайли балет билан шуғулланишни давом эттира олмаган.

Шундан сўнг актриса Лос-Анжелесга актрисалик фаолиятини бошлаш учун келган. У ўзининг Жанубий Африка акцентини тўғрилай олгач, 1995 йилда чиқарилган “Маккажўхори болалари-3: шаҳар ҳосили” фильмида эпизодик роль ўйнашга муваффақ бўлган.

Шундан кейин у бир нечта фильмларда суратга тушган. “Иблис адвокати” фильми унга машҳурлик келтирган. У бу фильмда машҳур актёрлар Ал Пачино ва Киану Ривз билан бирга суратга тушган.

Шарлиз Терон “Қудратли Жо Янг”, “Фазогир рафиқаси”, “Қизғин ўйинлар”, “Фараҳли ноябрь”, “24 соат” каби бир қатор фильмларда суратга тушган.

Терон “Маҳлуқ” фильмидаги қотил роли учун “Оскар”, “Олтин глобус” ва “Кумуш айиқ” каби нуфузли мукофотлар билан тақдирланган.

Терон охирги йилларда “Оппоғой ва овчи” (2012), “Прометей” (2012), “Телба Макс: ғазаб йўли” (2015) каби фильмларда суратга тушди.

Актриса 2008 йилда БМТнинг тинчлик элчиси этиб тайинланди.

Терон Жанубий Африкада ОИТСга қарши курашувчи хайрия жамғармасига асос солган.

2005 йилда Юлдузлар хиёбонида ўзининг “юлдузи” билан тақдирланган.

Терон 2012 йилда ЖАРлик болани боқиб олиб, унга Жексон исмини берган. 2015 йилда эса яна бир ЖАРлик қизни ўз оталиғига олиб, унга Август исмини берган.

Кўпроқ янгиликлар