Таниқли киноактер Жавоҳир Зокиров “Сотқин” фильмининг давоми суратга олиниши мумкинлигини билдирди.

Унинг айтишича. ушбу фильмдаги Ғулом образи ижро этар экан, бунақа одамларни содда, довдир қилиб кўрсата олмаслигини таъкидлади.

“Чунки бундай ифлослар одамларни жуда яхши биладиган психолог бўлишади. Хўш, Ғуломни ўта олифта қилиб кўрсатганимизнинг сабаби нима? Халқимиз билсин бу одамлар қандай қилиб ичимизга кириб олишию, қандай қилиб ишини бажариб кетишини. Ҳаётда энг кучли одамлар энг оддий одамлар бўлишади. Кучлилар Ғуломга ўхшаб спектакль қўйиб бировларнинг устидан кулмайди. Бугун ёшларимиз кўпинча одамларнинг машинаси, гапирадиган гапи, пулига эътибор беради, аслида эса одамнинг ички
дунёсига эътибор бериш керак. Ғулом образи орқали “одамлар, огоҳ бўлинглар, бунақа ифлосларга алданманглар, буларнинг охири вой” демоқчи эдим”, – дейди “Даракчи” нашрига интервьюда Зокиров.

У фильмда Ғуломни қамоққа олмасдан, қочириб юборишдан мақсад нима эканлигига ойдинлик киритди.

“Фильмда Ғулом қўлга тушганида анча ишонарсиз бўлиб қолиши мумкин эди. “Шундай одамлар ҳалиям орамизда юрибди, улардан огоҳ бўлинглар” деган мақсадда уни “қочириб юбордик”. Кўпгина мухлислар фильмнинг давомини кутишяпти. Билмадим, эҳтимол давоми ҳам бўлиши мумкин”, – дейди киноактёр.