КОНМEБОЛ президенти Хуан Анхель Напут ФИФА президентилги учун ўтказиладиган сайловга ўз номзодини кўрсатган УЕФАнинг амалдаги раҳбари Мишель Платинини қўллаб-қувватлашини маълум қилди.

"Биз Платини катта тажрибага эга амалдор сифатида ташкилотни бошқариш учун энг муносиб номзод деб биламиз. У жаҳон футболи ривожи учун катта ишларни амалга ошира оладиган инсон. Унинг УЕФАдаги раҳбарлик фаолиятини кузатиб, бунга амин бўлиш мумкин", дейди КОНМEБОЛ раҳбари.

Эслатиб ўтамиз, Платини ўтган ҳафтада ўзининг ФИФА президентлиги учун курашиши ҳақида расман маълум қилганди.

Ташкилотга 1998 йилдан буён раҳбарлик қилиб келаётган, шу йилнинг 29 майида ўтказилган сайловда бешинчи муддатга қайта сайланган Йозеф Блаттер эса шу вақтда ФИФА тизимида порахўрлик билан боғлиқ можаро келиб чиққанидан кейин ўзининг бу сафарги президентлик муддатини охиригача давом эттирмаслигини ва истеъфога чиқишини эълон қилган.

ФИФА президентлиги учун навбатдан ташқари сайлов 2016 йилнинг 26 февралида Цюрих шаҳрида ўтказилади.