Бўкалик Очилбой Шеров исмли шахс 5 нафар қишлоқдошини Россиянинг Екатеринбург шаҳрига олиб бориб, у ерда олдиндан амалга оширилган келишув асосида Михаил исмли шахсга сотиб юборди. Бу ҳақда “Ҳуқуқ” нашри ёзмоқда.
Шеров 20-25 ёшлар орасидаги қишлоқдошлари – Жавдат Уйғунов, Акмал Аллаев, Ботир Турғунов, Жавоҳир Турсунов, Шаҳзод Қораев, шунингдек, пскентлик яна икки шахсга ойига 500 доллар маош ваъда қилиб, Екатеринбургга олиб борди ва уларни Михаилнинг қўлига топшириб, ўзи кетиб қолди.
Михаил келишувга кўра йигитлар унга 3 ой ишлаб бериши, бунинг эвазига тўловни эса Шеров олиб кетганини маълум қилди. 3 ойлик оғир меҳнатдан сўнг у йигитларга паспортларини қайтариб берди.
Ўз юртларига қайтиб келган муҳожирлар Шеров устидан тегишли идорага ариза топширишди. Шеровнинг иши судда кўриб чиқилди. Жиноятчи 5 йилга озодликдан маҳрум қилинди.