Террорчи гуруҳлар томонида туриб турли давлатлардаги ҳарбий ҳаракатларда иштирок этаётган Тожикистон фуқаролари автоматик тарзда фуқароликдан маҳрум қилинади. Бу борада конституцияга киритлган ўзгартишлар парламентнинг иккала палатаси томонидан маъқулланиб, президент Эмомали Раҳмон томонидан имзоланди. Унинг бу борадаги фармони “Ховар” агентлигида чоп этилди.
Омбудсмен Зариф Ализоданинг журналистлар билан мулоқот чоғида айтишича, киритилган ўзгартишлар асосан фуқароликка қабул қилиш ва фуқароликдан чиқариш ҳолатларига боғлиқ. Жумладан, эндиликда давлат тилини билмайдиган чет эл фуқаролари ва фуқаролиги йўқ шахсларга Тожикистон фуқаролиги берилмайди. Айни пайтда, фуқаролиги йўқ шахсларнинг Тожикистон ҳудудида туғилган болаларига автоматик тарзда фуқаролик берилади. Тожикистон фуқароси билан никоҳдан ўтган чет эл фуқароси ёки фуқаролиги йўқ шахс уч йилдан сўнг фуқаролик паспортига эга бўлиши мумкин.
Шу билан бирга, террорчи гуруҳлар таркибига қўшилган мамлакат фуқароларига нисбатан қонунлар қаттиқлаштирилди.
Тожикистон ички ишлар вазири Рамазон Раҳимзоданинг маълумотларига қараганда, айни пайтда, Афғонистон, Сурия ва Ироқ ҳудудида фаолият юритаётган ИШИД, Толибон ва “Ўзбекистон ислом ҳаракати” террорчи гуруҳлари таркибида 600 тожикистонлик бор. Улар орасида болалар ва аёллар ҳам борлиги айтилмоқда.