Европа реконструкция ва тараққиёт банки (ЕРТБ) кейинги 4 йил ичида ўзининг Тожикистондаги фаолиятини белгиловчи Тожикистон бўйича янги стратегиясини тасдиқлади. Бу ҳақда ЕРТБнинг Душанбедаги ваколатхонаси маълум қилди.

Банкнинг бу давлатдаги асосий устувор йўналишлари қуйидагилардан иборат: хусусий тадбиркорлик, айниқса кичик ва ўрта корхоналарни кенгайтириш билан иқтисодий ўсишни рағбатлантириш ва бизнес муҳитни яхшилашга кўмак бериш; коммунал хизматлар сифатини, уларнинг операцион ва молиявий самарадорлигини ошириш; минтақавий алоқаларни мустаҳкамлаш ва иқтисодий интеграция.     

ЕРТБ ўзининг Тожикистонга инвестициялари ҳажмини 2014 йилда рекорд даражадаги 75 млн долларга етказган эди. 2015 йилда банк Тожикистондаги минтақавий аҳамиятга эга катта миқёсдаги лойиҳалар, жумладан мамлакатнинг электр узатиш тизимларини модернизациялаш учун 200 млн доллар инвестиция киритишни режалаштирмоқда.  

ЕРТБ 1992 йилдан бери Тожикистонда юритиб келаётган фаолияти давомида ушбу мамлакат иқтисодиётининг турли тармоқларига 460 млн доллардан кўпроқ сармоя киритган.