Қўқонлик Мавжуда Турдиева ўз фарзандини сотиш пайтида қўлга тушди. Бу ҳақда “Ҳуқуқ” газетаси хабар бермоқда.

Турдиева турмушдан чиққан ва иккита бола билан қолган эди. Енгилтабиат ҳаётга ўрганган аёлга бу икки фарзанд ортиқчалик қилиб қолди. Катта боласини онаси билан қолдирди, туғилганига эндигина 5 ой бўлган кичкинасини эса сотиб юборишга қарор қилди.

У Хажалхон Жумақўзиева орқали “мижоз” топиб, унга болани дастлаб минг долларга сотмоқчи бўлди. Аммо мижоз Холисхон Солиева пули камлигини, ҳозир 200 доллар, ҳужжатлар расмийлаштирилгач, яна 500 доллар беришини айтди.

Шундай келишув бўлмаганига қарамай, охирги лаҳзада Солиева ИИБга мурожаат қилишга қарор берди. Турдиева ўз фарзанди учун 200 доллар пул олаётган пайтда милициячилар томонидан қўлга олинди.

Суд Турдиевага 3 йил синов муддати белгилади. Ўртада даллоллик қилган, илгари ҳам одам савдоси туфайли судланган Жумақўзиева 5 йилга озодликдан маҳрум қилинди.
Чақалоқ Қўқон шаҳридаги гўдаклар уйига топширилди.