Мағлубият ҳиссини тотмаган АҚШлик боксчи Кичик Флойд Мэйуэзер вазн тоифасидан қатъий назар барча замонларнинг энг яхши боксчилари рўйхатида ўзини биринчи ўринга лойиқ топди. Бу ҳақда The Guardian нашри хабар бермоқда.

Мэйуэзер бу рўйхатда 2-ўринни панамалик боксчи Роберто Дюранга, 3-ўринни ўзининг ҳамюрти Пернелл Уитакерга, 4-ўринни мексикалик боксчи Хулио Сезар Чавесга ва ниҳоят 5-ўринни афсонавий америкалик боксчи Муҳаммад Алига берди.

“Улардан ҳар бирини ҳурмат қиламан”, деб айтди боксчи.

Мэйуэзернинг бу фикрига ўта оғир вазн тоифасидаги собиқ мутлақ жаҳон чемпиони Леннокс Льюис эътироз билдирмоқда. Британиялик боксчининг фикрича, Мэйуэзер эмас, балки айнан у бу рўйхатнинг 1-ўринига лойиқ.

“Мен ўта оғир вазн тоифасидаги охирги мутлақ чемпиониман. Афтидан, мен энг зўрман”, деб айтди Льюис BoxingScene порталига берган интервьюсида.