10 август куни Ўзбекистон президенти “Ўзбекистон Республикасининг айрим қонунчилик актларига ўзгартиш ва қўшимчалар киритиш тўғрисида”ги қонунни имзолади. Унга кўра, мамлакатда янги муқобил жазо тури – озодликни чеклаш жорий қилинди.

Қонун парламентнинг қуйи палатаси томонидан 29 июль куни қабул қилиниб, 6 август куни Сенат томонидан маъқулланди. 11 август куни қонуннинг ОАВда эълон қилиниши билан у кучга кирди.
Сенаторларнинг фикрича, кўрсатилган ўзгартиш ва қўшимчалар адолатли жазо принципига тўла риоя қилинишига, жазоланувчини жамиятдан тўлалигича ажратмасдан, унинг пушаймон бўлиши ва тузалишига ёрдам беради. Шунингдек, бу халқаро стандартларнинг миллий қонунчиликка имплементация қилинишидаги бир босқичдир.
Шунингдек, Маъмурий жавобгарлик тўғрисидаги кодексга, “Ўзбекистон Республикаси Вазирлар Маҳкамаси тўғрисида”ги, “Прокуратура тўғрисида”ги, “Меъёрий-ҳуқуқий актлар тўғрисида”ги қонунларга ҳам маълум ўзгартишлар киритилди.