Олий ва ўрта махсус таълим ҳамда молия вазирликларининг қўшма қарори билан “ОТМ талабаларига стипендиялар тайинлаш ва тўлаш тартиби тўғрисида”ги йўриқномага қўшимчалар ва ўзгартишлар киритилди. Бу ҳақда "Адолат кўзгуси" газетасида ёзилган.

Уларга кўра, Тошкент давлат юридик университети учун таълимнинг модуль тизими жорий қилинганлиги муносабати билан белгиланган тартибга мувофиқ ўқишга улгураётган талабаларга стипендия тайинлаш ўқув йилида 2 маротаба ўтказилади ва стипендия ҳар бир ўқув семестри ойининг 1-кунидан тўланади. Стипендиялар якуний назорат натижалари эълон қилинганидан сўнг тўланади.

Истисносиз барча ОТМ учун белгиланган тартибга мувофиқ академик қарзини бартараф этган талабаларга стипендия академик қарзни баратараф этишнинг бир ойлик муддати тугаганидан кейинги ойнинг 1-кунидан бошлаб, талабанинг давоматига қараб, табақалаштирилган коэффициентларни қўллаган ҳолда кейинги ўқув семестрига қадар тайинланади.

Шунингдек, барча ОТМ учун аёл талабаларга стипендия ва болани парваришлаш бўйича нафақа тўлаш тартибига тузатиш киритилди. 2 ёшгача боласи бўлган ва ўқишни таълимнинг кундузги шаклида давом эттираётган талаба аёлларга стипендия тўлиқ миқдорда тўланади. Илгари аёл талабаларга бир вақтнинг ўзида тўлиқ ҳажмда стипендия ва болани параваришлаш бўйича ойлик нафақа тўланар эди.