The Financial Times нашрининг хабар беришича, Британиянинг Pearson ноширлик уйи The Economist Groupнинг ўзига тегишли улушини 400 миллион фунт стерлинг (тахминан 620 миллион доллар) эвазига сотувга қўйди.

Яқин кунларда Pearsonнинг The Economist Groupдаги улушини сотиш бўйича расман эълон қилиниши кутилмоқда. Ҳозирча мазкур хабарга Pearson бошқарувчиларидан ҳеч ким изоҳ бергани йўқ. Бироқ, маълумотларга қараганда, бунга қадар Pearson журнални сотиш бўйича Американинг Hearst медиакорпорацияси билан музокаралар олиб борган, бироқ келишув номаълум сабабларга кўра амалга ошмаган.

Компания The Economist ва The Financial Times нашрларини сотиш қарорини таълимий адабиётларни чоп этишга тўлиқ эътибор қаратиш ва медиаактивлардан халос бўлиш истагида эканлиги билан изоҳлади. The Economist сотилганидан сўнг Pearson таълимий адабиётлар чоп этилиши билан боғлиқ бўлмаган фақатгина битта медиаактив – китоб нашр қилувчи “Penguin Random House” нашриёт уйининг 47 фоизлик акцияларига эгалик қилади.

Pearson ноширлик уйи 1957 йилдан буён The Economist ҳафталик журналини чоп этувчи The Economist Groupнинг 50 фоиз акцияларига эгалик қилиб келар эди. Июль ойида Pearson ўзига тегишли бўлган The Financial Times нашрини ҳам Япониянинг Nikkei медиакорпорациясига 844 миллион фунт стерлинг (тахминан 1,3 миллиард доллар)га сотиб юборган эди.

Pearson`нинг харид улуши, The Financial Times маълумотига кўра, Ротшильдлар оиласи ҳамда италиялик Аньеллилар оиласи назорат қилувчи Exor инвестицион компаниясига тегишли. Айни пайтда, The Economistнинг харид улушига эгалик қилувчи Аньеллилар оиласи эса La Stampa, Corriere della Sera, La Gazzetta dello Sport, El Mundo сингари газета ва журналларни тасарруф этади.