Ўзбекистондаги бир қатор интернет нашрларида Тошкент шаҳридаги Инҳа университети ўқув биноси бузиб ташланиши тўғрисидаги хабарлар тарқалганидан сўнг университет маъмурияти айни пайтда фаолият олиб бораётган ўқув биносининг бузилмаслиги тўғрисида хабар қилди.

Эслатиб ўтамиз, жорий йил 5 августда Вазирлар Маҳкамасининг “Тошкент шаҳридаги Инҳа Университетининг фаолиятини ташкил этиш ҳамда Ўзбекистон Республикаси Фанлар Академиясининг Асосий кутубхонасини моддий-техника базасини мустаҳкамлашга доир қўшимча чора-тадбирлар тўғрисида”ги қарори қабул қилинган эди.

Мазкур қарорда Тошкент шаҳри Зиёлилар кўчаси 13а манзилидаги қурилиши тугалланмаган бинонинг бузилиши назарда тутилган бўлиб, Тошкент шаҳридаги Инҳа университети янгидан барпо этилиши мўлжалланган иншоот ҳисобига ўз ўқув биносини кенгайтиришни режалаштираётгани таъкидлаб ўтилди.