АҚШ Давлат котиби Жон Керри унинг электрон мактублари россиялик ва хитойлик хакерлар томонидан ўқилаётганинг “анча катта эҳтимоли” борлигини айтди.

Керри бу ҳақда CBSNews телеканалига берган интервьюсида маълум қилди. 

“Бунинг эҳтимоли мавжуд. Бунга бўлиши мумкин эмас нарсадек қараш керакмас, биз россиялик ва хитойлик хакерлар охирги кунларда АҚШдаги кўп сондаги ташкилотларга ҳужум қилишганини биламиз. Ва буни эсда тутган ҳолда почтам орқали нималардир ёзаман”, деб айтди Керри журналистнинг саволига жавобан.

Аввалроқ россиялик хакерлар Пентагон компьютер тизимига “мураккаб ташкил этилган киберҳужум” уюштирганлари маълум қилинганди. Қайд этилишича, ҳужум 25 июлда амалга оширилган. Айтилишича, хакерлар Пентагоннинг электрон ёзишмалар билан алмашиш махфийлаштирилмаган тизимини бузиб кириб, у ерда Пентагоннинг 4 мингга яқин ходими ҳақидаги маълумотларга кира олганлар.