Куни кеча Facebookдаги «Потребитель.уз» гуруҳи аъзоларининг ташаббуси билан қариялар уйига жойлаштирилган отахон ҳаётига оид маълумотлар ошкор бўлди.

12 август куни 18:00 атрофида Тошкент шаҳридаги Олой бозорида жойлашган «Ипотека банк» филиалларидан бирида ўтирган отахон ҳақида илк хабар ва унинг сурати жойлаштирилган эди. Шундан сўнг гуруҳ аъзоларининг саъй-ҳаракати билан исм-шарифи, аввал яшаган манзили аниқланиб, қариялар уйига жойлаштирилган 86 ёшли отахон бунга қадар тўрт ой давомида ҳар куни эрталаб ушбу банк филиалига келган.

Банк кассирлари ва қўриқчилари уни парваришлаб, янги кийим-бош сотиб олиб беришган. Шунингдек, кунлик ижара ҳақи 5000 сўм бўлган хонадон топиб, навбати билан пулини тўлаб боришган.

Банк кассирларнинг маълум қилишича, улар отахонни қариялар уйига жойлаштириш учун кўп бор уриниб кўришган: қон таҳлили топширган, турли маълумотномалар тўплашган. Бироқ уринишлари шу вақтга қадар самара бермаган.

Фейсбукдаги уни шахсан танувчилар изоҳига кўра, отахон муқаддам Тошкент шаҳри марказида шахсий уйида яшаган. Қизи аллақачондан бери АҚШда яшайди, ўғли эса 5 йил аввал уйни сотиб, отасини ўз ҳолига ташлаганча Россияга кетиб қолган.

Бугун эрталаб (13 август) Меҳнат ва аҳолини ижтимоий муҳофаза қилиш вазирлиги вазиятни тўлиқ назорат остига олганини маълум қилди. Айни пайтда эса отахон қариялар уйида, унинг ҳужжатлари расмийлаштирилмоқда.