Қирғизистонда дунёдаги энг баланд чўққилардан бирини забт этиш вақтида испаниялик альпинист вафот этди, дейилади Қирғизистон қуролли кучлари ахборот таъминоти бошқармаси хабарида.

Тахминий маълумотларга кўра, альпинист Хосе Хернандес ўткир юрак етишмовчилиги хасталигидан вафот этган.

Қирғизистон Мудофаа вазирлиги вертолётида олти нафар испаниялик альпинист ҳамда уларнинг оламдан ўтган шериги жасади Ўш шаҳрига эвакуация қилинди.

“13 август куни Қирғизистон Республикаси ҳарбий ҳаво кучлари авиацияси Ленин чўққисининг 4000 метр баландликдаги Очиқ-тош майдончасидан етти нафар испаниялик альпинистлар олиб кетилди”, дейилади хабарда.

Бу қирғиз ҳарбийларининг Жанубий минтақадаги жанговар навбатчилиги вақтида ой бошидан буён тўртинчи маротаба қутқарув ишларини амалга оширишидир. Унга қадар 2 августда Ленин чўққиси ҳудудидаги чўққилардан бирини забт этишга интилган уч нафар россиялик жасади олиб кетилган бўлса, бир неча кундан сўнг яна бир россиялик спортчининг вафот этгани маълум бўлди. Унинг жасади билан бирга жароҳат олган француз альпинисти ҳам эвакуация қилинди. 10 август куни эса қирғизистонлик вертолётчилар жароҳат туфайли Гатжир музлигини забт эта олмаган тўрт нафар россиялик альпинистни қутқарди.