Экспертларнинг фикрича, Россия ва НАТОнинг ҳарбий ўйинлари давлатлар ўртасида ишончсизлик муҳитининг кучайишига олиб келмоқда, деб ёзмоқда The Daily Mail нашри.

Буюк Британия нодавлат тадқиқот маркази European Leadership Network ўзининг тадқиқотлари натижаларига кўра Россия ва НАТОнинг охирги катта миқёсдаги ҳарбий машғулотлари худди давлатлар қуролланган тўқнашувга тайёргарлик кўраётгандек кўриниш олганини таъкидламоқда.

“Афтидан, Россия НАТО билан НАТО эса Россия билан тўқнашувга тайёргарлик кўраётганга ўхшайди”, деб айтмоқда марказ директори Иен Кернс.

Бундан ташқари, тадқиқот натижаларининг кўрсатишича, Россиядаги машғулотлар анча каттароқ кўриниш олган.

Мисол тариқасида шундай маълумотлар келтирилмоқдаки, уларга кўра НАТО жорий йилда 15 минг ҳарбий иштирокида тахминан 270та машғулот ўтказмоқчи бўлган бир пайтда Россия 80 минг кишини жалб қилган ҳолда 4000та машғулот ўтказишни режалаштирмоқда.

Россия билан АҚШ муносабатларидаги совуқлик бир йил аввал Қримнинг Россияга қўшиб олиниши сабабли юзага келган эди. Ўшандан бери Россия ҳарбий қудратининг кучайтирилгани ҳақида бир неча маротаба маълум қилинганди. Россияда турли қўшинлар иштирокида мунтазам равишда машғулотлар ўтказиб турилади. Яқинда минглаб россиялик разведкачилар Россиянинг жанубий вилоятларида ҳамда Арманистонда машғулотлар ўтказишни бошлади.