Тожикистон қўшни Афғонистон ҳудудидан кириб келаётган гиёҳванд моддалар оқимига қарши кураш йўлида жиддий чора-тадбирлар кўрмоқда. 2013-2020 йилларда гиёҳванд моддаларнинг ноқонуний савдосига қарши кураш миллий стратегиясига мувофиқ мамлакат ҳуқуқ-тартибот идоралари 2015 йилнинг биринчи ярмида 2.2 тонна наркотикни мусодара қилишди. Бу ҳақда гиёҳванд моддалар назорати агентлиги раҳбари Рустам Назарзода матбуот анжумани чоғида баёнот берди.
Бу кўрсаткич 2014 йилга нисбатан 11 фоизга камроқдир. Аммо бу тушиш, Назарзоданинг фикрича, ишларнинг сусайганидан эмас, балки афғонистонлик контрабандачиларнинг камроқ маҳсулот ишлаб чиқарганидан далолатдир. Ярим йиллик ҳисобида эса, аксинча, ўсиш кузатилди.
2014 йили Афғонистонда 6 400 тонна афюн чиқарилди. Унинг 98 фоизи мамлакатнинг жанубий, шарқий ва ғарбий қисмларига тўғри келади.
Январдан июнгача бўлган даврда Тожикистон чегарачилари 657 кг гиёҳванд модда ушлаб қолишди. Чегара қўшинлари командири генерал-лейтенант Ражабали Раҳмоналининг сўзларига қараганда, шундан 46 кг героин ва 255 кг афюн хом ашёсидир.