Хитойнинг йирик авиакомпаниялари дунёдаги ўз вақтида, пухта ишламайдиган авиакомпаниялар сирасидан деб топилди. Бу ҳақда Хитойнинг Civil Aviation Data Analysis компанияси томонидан тайёрланган авиакомпаниялар рейтингида айтилган.

Тадқиқот муаллифлари дунёнинг 103та авиакомпанияси ишининг самарадорлигини баҳолаб чиқишди. Олинган натижалар Хитой учун қувончли бўлмади. Хитойнинг учта йирик авиакомпанияси – China Southern Airlines, Air China ва China Eastern Airlines ушбу рўйхатнинг энг пастки қаторларидан жой олди. Улар орасида China Southern Airlines компанияси энг яхши кўрсаткичга эга бўлди – бу компания самолётлари амалга оширилган жами рейсларнинг 70,45 фоизида ўз вақтида учиб, ўз вақтида манзилга етиб келган. Бу кўрсаткич компанияга 86-ўринни эгаллашга имкон берди. Унинг асосий рақобатчилари Air China ва China Eastern авиакомпаниялари жадвал бўйича 66,41 ва 64,46 фоиз ҳолатда рейсни вақтида амалга оширган бўлиб, мос равишда рейтингда 93- ва 94-ўринларни эгаллади.

Хитой компаниялари учун яна бир аянчли ҳолат шу бўлдики, Хитой авиакомпанияларидан бирортаси ҳам юқори 30таликка кира олмади. Континентал Хитой авиакомпаниялари ичида Okay Airways ва Shandong Airlines компаниялари бу борада рейтингда 80- ва 81-ўринларни эгаллади. Тайваннинг TransAsia Airways авиакомпанияси 84,72 фоиз ҳолатда ўз вақтида учган самолётлар билан 65-ўринни эгаллади. Гонконгнинг Cathay Pacific Airways авиакомпанияси эса 74-ўринни эгаллади.