Хитой ҳукумати жамият учун хавф солувчи 120 та қўшиқни тақиқлаб қўйди. Бу ҳақда CNN телеканали маълум қилди. Хитой маданият вазирлигида бу қўшиқлар  зўравонлик, бўйсунмаслик, ахлоқсизлик ва баҳаёликни тарғиб қилиши айтилди. 

Тақиқловга тушган хитой қўшиқлари орасида “Пулинг бўлмаса, дўстинг ҳам йўқ”, “Мактабга боришни истамайман”, “Тасодифий алоқа” каби қўшиқлар бор. Бундан ташқари, MC Hotdog исмли оммалашган ижрочининг “Мен хитойлик аёлларни эмас, тайванлик кизларни яхши кўраман” сўзлари бўлган ва “газни босиб, ҳеч нарса қилмаслик” ҳақида куйланган қўшиқлари тақиқ остига тушди.  

Қора рўйхатга тушган қўшиқлар интернет сайтлардан ўчириб ташланиши керак. Вазирлик қонунга бўйсунмаганлар қаттиқ жазоланишини айтиб ўтди.

Ижтимоий тармоқларда  ҳукуматнинг талаби кенг муҳокама қилинишни бошлади. Бир фойдаланувчи Weibo ижтимоий тармоғида ҳукуматга бундай “маслаҳати” учун миннатдорчилик билдириб, аввал ҳаттоки эшитмаган бу қўшиқларини энди тинглаб кўришга ошиқаётганини айтиб ўтган.

Хитойда, айниқса маданият соҳасида, цензура қўлланиши тез-тез учраб туради. 2014 йил декабрида “Хитой императрицаси” телесериали ундаги аёл қаҳрамонларнинг очиқ кийимлари сабабли Хитой телевидениеси эфиридан бир неча кунга олиб ташланган эди. 2015 йилнинг январида шоу ундаги очиқ саҳналар кесиб ташланган ҳолда қайта эфирга узатилган.