Хитой раҳбариятида юань борасида ихтилоф юзага келди. Reuters ахборот агентлиги маълумотларига кўра, ҳукуматнинг баъзи аъзолари миллий валютани кўпроқ миқдорда – содир бўлган девальвацияни ҳисобга олиб 10 фоизга қадрсизлантириш керак деган фикрни билдирмоқдалар.

Агентликнинг маълумотларига кўра, бу нуқтаи назар тарафдорлари “юань етарлича қадрсизлантирилиши кераклигини, йўқса экспортни рағбатлантириб бўлмаслигини” айтишмоқда. Oxford Economics мутахассисларининг фикрича, Хитой пул тизими ярим-бир йил аввал  кузатилган даражагача яхшиланиши учун юань 10-15 фоизга девальвация қилиниши керак.

11 август куни Хитой Халқ банки хар куни ўрнатиладиган юань курсини рекорд даражадаги 1,9 фоизга туширди. 12 август куни курс яна 1,6 фоизга тушди. Бироқ банк “юань қадрсизланишининг давом этишига” асос кўрмаяпти.

Ўз навбатида Standard & Poor's халқаро рейтинг агентлиги Хитой Халқ банки томонидан кўрилаётган чоралар экспортни рағбатлантириш учун қилинаётганига шубҳа билдирмоқда. “Экспорт кўпроқ ташқи талаб функцияси ҳисобланади, айирбошлаш курси эса иккинчи даражали роль ўйнайди”, деб айтди S&P’нинг Осиё-Тинч океани минтақаси бўйича катта иқтисодчиси Пауль Грюнвальд.