8 август куни Хоразмда “Гурвак – Хоразм қовунлари рамзи” номли тадбир ўтказилди. Бу ҳақда “Ўзбектуризм” миллий агентлиги сайти орқали ахборот берилди.
Ушбу қовун сайли Хиванинг Ичан Қалъа музей-қўриқхонасининг Кўҳна Арк майдонида ташкил этилди.
Гурвак – Хоразмда етиштириладиган машҳур қовун нави. Аммо фестивалда қовуннинг бошқа навлари, жумладан, қорақош, гулоби, нони гўшт сингарилар намойиш этилди. Тадбир меҳмонлари жами 30 навдаги қовунларни бир жойда кўриш имконига эга бўлди.
Сайлда ўнлаб фермер хўжаликларининг вакиллари ўз маҳсулотлари билан қатнашди. Қовундан ташқари, тарвуз, ошқовоқ ва бошқа полиз экинлари, мева ва сабзавотлар расталардан ўрин олди.
Сайлни хорижлик меҳмонлар ҳам кузатиб боришди. Жумладан, япониялик туристлар гуруҳи сайл доирасидаги тадбирларда фаол иштирок этиб, Хоразм маданияти билан яқиндан танишиш имкониятига эга бўлди.