Туркияда Ҳожи Ҳофиз Юсуф Йилмаз номидаги масжиднинг тантанали очилиши маросимида Туркия президенти Ражаб Тойиб Эрдўғаннинг бошига каклик ўтириб олди. Бу ҳақда Turkiye нашри хабар бермоқда.

Ушбу масжид қурилиши лойиҳаси Эрдўғаннинг шахсан ўзи иштирокида ишлаб чиқилган, қурилиш 3 йил давом этган. Эрдўғаннинг ўзи масжидни “турк халқи цивилизациясини ўзида акс эттирувчи серҳашам иншоот” деб атади ва бу масжид ўзига диндорларни ва сайёҳларни жалб қилишига умид билдирди.

Эрдўған нутқ сўзлагандан кейин анъанага кўра кабутарларни озодликка чиқариб юбориш учун кабутарлар сақланадиган қафасга келиб, кабутарларни озодликка чиқариб юборганда унга тўсатдан каклик “ҳужум” қилиб қолди: қуш биринчи президентнинг орқасига қўниб, кейин бошига ўтириб олди. Қўриқчилар қушни ҳайдаб юборишларига тўғри келди.

Ражаб Тойиб Эрдўған 2003-2014 йиллар давомида Туркия бош вазири лавозимида ишлаб келгандан кейин 2014 йилда президент этиб сайланди. Эрдўған турк маданий меросига ғамхўрлик билан қарашини бир неча бор айтган ва Туркияда ва хорижда янги масжидлар очилишида имкони борича иштирок этиб келади. 2014 йилда у Христофор Колумб хотираларида денгизчи томонидан Кубада масжид топилгани ҳақида ёзувлар борлигини таъкидлаб, ҳаттоки бу масжидни бошқатдан қуришни ҳам таклиф қилган эди.