Хитойнинг Тяньцзинь портидаги хавфли моддалар омборида рўй берган портлаш натижасида қурбон бўлганлар сони 44 нафарга етди. Бу ҳақда "Синьхуа" агентлиги қутқарув штаби маълумотларига асосланган ҳолда хабар берди.

Ҳалок бўлганларнинг 12 нафари ўт ўчирувчилардир. Шаҳар шифохоналарига эса 520 бемор жойлаштирилган бўлиб, шифокорлар 66 нафарининг аҳволи оғир эканини айтишмоқда.

Reuters агентлиги Beijing News нашри хабаридан иқтибос келтиришича, шаҳар ёнғин хавфсизлиги департаменти 36 нафар ўт ўчирувчи билан алоқани йўқотган.

Хабарингиз бор, Хитойнинг Tianjin Dongjiang Port Rui Hai International Logistics Co. Ltd. логистика компаниясига тегишли хавфли кимёвий моддалар сақланувчи омборда чоршанба куни кечқурун кучли портлаш келиб чиққан эди.

Мазкур компаниянинг йиллик юк айирбошлаш кўрсаткичи 1 млн тоннани ташкил этади.

“Синьхуа” агентлиги маълумотларига кўра, портда икки марта портлаш содир бўлган. Бирининг қуввати 3 тонна тротил эквивалентига, иккинчиси эса 21 тоннага тенг бўлган.

China Central Television (CCTV) телеканали биринчи портлаш маҳаллий вақт билан 23:30да, иккинчиси эса 30 сониядан сўнг содир бўлганини хабар қилди. Bloomberg хабарида эса портлашдан 40 дақиқа аввал омборхонада келиб чиққан ёнғин тўғрисидаги дастлабки хабар келиб тушганини айтиб ўтилган.

Маҳаллий вақт билан 14:30 келиб Тяньцзинь маъмурияти ёнғин бартараф этилгани ҳақида маълум қилган. Бироқ кимёгар-мутахассислар атроф-муҳитга портлаш қолдирган хавф даражаси бўйича хулосани кечроқ эълон қилишди.

Портлаш тўлқини 15 миллион аҳоли истиқомат қилаётган шаҳарда бир неча километр радиусгача ўз таъсирини кўрсатган. "Синьхуа" хабарига кўра, кўплаб аҳоли вакиллари ўз уйларидаги дераза ва аквариумлар синиб кетганидан шикоят қилишган. Портлашдан кейин юзага келган ёнғин бир неча соат давом этди. Логистика маркази ҳудудидаги бир неча бино ва иншоотлар, кўп даражали автотураргоҳда сақланаётган минглаб автомобиллар ҳам бутунлай ёниб кетган.

Tianjin Port Co. компаниясининг маълум қилишича, портлаш порт ишига таъсир кўрсатмаган. Шанхай биржасида Tianjin Port акциялари пайшанба куни 4 фоизга арзонлаган, дея хабар қилди Bloomberg.

Портлаш келтириб чиқарган зарар миқдорини аниқлаш ишлари ниҳоясига етгани йўқ. Бироқ портлаш натижасида Хитойдаги автомобил импорти бўйича йирик портлардан бири бўлган Тяньцзинда сақланаётган 1500та Renault русумли автомобиль ёниб кетган. Bloomberg хабарига кўра, мазкур автомобилларнинг бозор нархи 210 млн юань (33 млн доллар) атрофида. Шунингдек, портдаги Volkswagen компанияси омборхонасига ҳам шикаст етган.

ХХР раиси Си Цзиньпин ва бош вазир Ли Кэцян жабрланганлар сонини камайтириш учун барча чораларни кўришни талаб қилди. Улар қутқарув операцияси ва портлаш асоратларини бартараф этиш бўйича бошқарув штаби иши устидан назоратни ўз зиммасига олишди. Мазкур штабни Давлат хавфсизлиги вазири Гуо Шенкунь бошқармоқда.

Си Цзиньпин, шунингдек, шаҳар ҳокимиятидан жабрланганларга барча зарур ёрдамларни кўрсатиш, бедарак йўқолганларни қидириб топиш ва ёнғин асоратларини бартараф этиш бўйича чора-тадбирларни амалга ошириш вазифасини топшириб, ёнғин сабабларини аниқлаш ҳамда келгусида бу каби хатоларга йўл қўймаслик учун керакли сабоқни олишни ҳам қатъий талаб қилди.