АҚШ Адлия вазирлиги Кубадаги Гуантанамо базасидаги махсус қамоқхонада сақланувчи, 8 йил давомида очарчилик эълон қилиб келаётган маҳбус Тариқ Ба Ўдахни озод этишдан бош тортди. Бу ҳақда Reuters ахборот агентлиги маълум қилди.

Яманлик 36 ёшли Ўдахнинг ҳозирдаги вазни 1,62 метр бўйида 33,5 кг ни ташкил қилмоқда. У Покистон армияси томонидан Афғонистон чегарасида қўлга олинган ва “Толибон” ҳаракатига қўшилиш учун ҳарбий тайёргарликдан ўтганликда айбланмоқда. Маҳбус Гуантанамода 2002 йилдан бери сақланмоқда.   

2007 йилда Ўдах очарчилик эълон қилиб, қуюқ овқат ейишдан бош тортган. Шундан буён Ўдахга нисбатан куч ишлатилган ҳолда, уни бурни орқали қиритилувчи трубка орқали мажбуран овқатлантириб келинмоқда. Охирги 18 ой ичида у жуда кўп вазн йўқотди ва унинг адвокатлари мижозларининг саломатлиги оғирлашгани сабаб унинг озод этилишини талаб қилишмоқда. Пентагонда аввалроқ айтилганидек, агар Ўдах озод этилса, бундан бошқа маҳбуслар ўрнак олиши ва шундай ҳолатларнинг кўплаб юз беришига олиб келиши мумкин.